19 март Президенти Ҷумҳурии Тоҷикистон Эмомалӣ Раҳмон ба мактаб-интернати № 4-и ноҳияи  Синои шаҳри Душанбе омада, барои 354 нафар тарбиятгирандагони он аз ҳисоби маоши  худ 3 тонна картошка, 2 тонна пиёз, 2 тонна сабзӣ, 300 килограмм гӯшт, 1 тонна биринҷ, 1 тонна равған,  500 килограмм марҷумак ва 1 тонна шакар овард.

Ҳамзамон аз ҳисоби фонди захиравии Президенти Ҷумҳурии Тоҷикистон Эмомалӣ Раҳмон ба ин даргоҳи таълимӣ 5 маҷмӯи компютер бо принтери ранга,  354 ҷуфт сару либос ва пойафзол ба маблағи умумии 35800 сомонӣ тақдим карда шуд.

Сарвари давлат  дар ин ҷо бо шароитҳои таҳсилу фароғати хонандагони мактаб - интернат  шинос шуда, барномаи идонаи Наврӯзии хурдсолонро тамошо намуд.

Худи ҳамин рӯз Президенти Ҷумҳурии Тоҷикистон Эмомалӣ Раҳмон ба хонаи истиқоматии собиқадори ҷангу меҳнат Табаралӣ Мирзоеви 88 - сола, сокини маҳаллаи Карамови ноҳияи ба номи Исмоили Сомонии пойтахт омада, бо аҳли оилаи ӯ сӯҳбат дошт ва онҳоро бо иди Наврӯз муборакбод намуд.