12 май дар шаҳри Душанбе бо ибтикори Хадамоти матбуоти Президенти Ҷумҳурии Тоҷикистон, шӯъбаи иттилоотию таҳлилии Дастгоҳи иҷроияи Президенти Ҷумҳурии Тоҷикистон, раёсати иттилоотии Вазорати корҳои хориҷии Ҷумҳурии Тоҷикистон ва дафтари Созмони Милали Муттаҳид оид ба мусоидати сулҳ дар Тоҷикистон дар мавзӯи "Механизмҳои асосии рушди фазои иттилоотии дохилӣ ва берунии Ҷумҳурии Тоҷикистон" семинар доир гардид.
Намояндаи Дабири кулли СММ, роҳбари Дафтари СММ оид ба мусоидати бунёди сулҳ дар Ҷумҳурии Тоҷикистон Владимир Сотиров аз ҷумла зикр намуд, ки амри Президенти Ҷумҳурии Тоҷикистон Эмомалӣ Раҳмон аз 4-уми марти соли 2005 доир ба баргузории нишастҳои матбуотӣ дар вазорату идора ва муассисаҳои гуногун роҷеъ ба натиҷаҳои фаъолияти семоҳа саривақтию зарурӣ мебошад.
Дар ин замина ҳамкории марказҳои матбуоти вазорату идораҳо бо кормандони воситаҳои ахбори омма сифатан беҳтар шуда, дастрасии бештари иттилоти зарурӣ таъмин мегардад.
Дар семинар ҳамчунин зарурати дар мамлакат таъсис ёфтани "Маркази миллии иттилоот" таъкид шуд, ки ҳадафи асосии фаъолияти он таъмини саривақтии иттилоот ба ҷомеа ва шаффофияти он маҳсуб меёбад.