Президенти Ҷумҳурии Тоҷикистон Эмомалӣ Раҳмон бо ҳайати ҳамроҳонаш нимаи дуюми рӯзи 23-уми май ба ширкати оламшумули Самсунг Электроникс омада, бо роҳбарият ва мутахассисони он вохӯрӣ намуданд.
Дар мулоқот аз он изҳори қаноатмандӣ карда шуд, ки робитаҳои соҳибкорони Тоҷикистону Корея зина ба зина беҳтару қавитар мегардад.
Баъди шиносоӣ бо технология ва маҳсулоти навтарини ширкат ҷонибҳо мавриди таъсису ба роҳ мондани корхонаҳои муштараки истеҳсолкунандаи қисмҳои эҳтиётӣ, воситаҳои электротехникию маишӣ дар заминаи корхонаҳои Ҷумҳурии Тоҷикистон таклифу пешниҳодоти ҷолиб изҳор доштанд. Мутахассисони ҳарду тараф дигар имкониятҳои мавҷудаи ҳамкориро мавриди омӯзишу баррасӣ қарор доданд.
Президенти Ҷумҳурии Тоҷикистон Эмомалӣ Раҳмон аз рӯи барномаи сафар ба Ҷумҳурии Корея шоми рӯзи 23-юми май бо роҳбарият, мутахассисони ширкати овозадори ДЭУ, инчунин намояндагони доираҳои соҳибкории Корея мулоқот кард.
Дар Ҷумҳурии Тоҷикистон бо мақсади фароҳам овардани шароитҳои мусоиди ҳуқуқӣ барои ҷалби сармояи хориҷӣ, ҳамкорӣ бо сектори хусусӣ ва ташкили корхонаҳои муштарак тадбирҳои амиқ андешида шудааст, - гуфт Президенти Ҷумҳурии Тоҷикистон Эмомалӣ Раҳмон.