6 июн Президенти Ҷумҳурии Тоҷикистон Эмомалӣ Раҳмон аз Сафири нави Фавқулодда ва Мухтори Арабистони Саудӣ Алӣ ибни Муҳаммад ал-Хамдон эътимоднома қабул кард.

Баъди анҷоми маросими расмии эътимодномасупорӣ ҷонибҳо доир ба муҳимтарин  масъалаҳои ҳамкорӣ, ба хусус робитаҳои иқтисодию тиҷоратии миёни Ҷумҳурии Тоҷикистон ва Арабистони Саудӣ мубодилаи афкори судманд намуданд.

Арабистони Саудӣ аз ҷумлаи мамолики пешрафтаи  араб аст, ки Ҷумҳурии Тоҷикистон бо он равобити муназзам ва судманди сиёсӣ дорад, тазаккур дода шуд дар мулоқот.

Президенти Ҷумҳурии Тоҷикистон Эмомалӣ Раҳмон ва дипломати араб Алӣ ибни Муҳаммад ал-Хамдон бо назардошти возеҳии тамоюлот ва таҳаввулоти мусбат, талошҳои муштарак ҷиҳати саҳмгузорӣ дар ҳалли бӯҳрону низоъҳои минтақавӣ, таваҷҷӯҳ ба ҳалли мушкилоти умумибашарӣ, зарурати вусъати муборизаи муштарак бо таҳдидҳо ва хатарҳои глобалиро  махсус таъкид намуданд.

Дар сӯҳбат ба масъалаи раванди иқтисодии Афғонистон ва як қатор масъалаҳои дорои аҳамияти минтақавию ҷаҳонӣ мароқ зоҳир карда шуд.