8 июн Президенти Ҷумҳурии Тоҷикистон Эмомалӣ Раҳмон Сафири Фавқулодда ва Мухтори Ҷумҳурии Маҷористон дар Тоҷикистон Миклош Ятсковичро бинобар анҷом ёфтани иҷрои вазифааш дар ин мансаб ба ҳузур пазируфт.
Сардори Давлат аз Сафири Маҷористон барои саъю кӯшишаш бобати рушди муносибатҳои Тоҷикистону Маҷористон тайи солҳои дар Тоҷикистон буданаш изҳори миннатдорӣ кард.
Тарафҳо бо камоли қаноатмандӣ қайд намуданд, ки байни ҳарду мамлакат муносибатҳои дӯстӣ, анъанавӣ ва ҳамкории самарабахш густариш меёбанд.
Президенти Ҷумҳурии Тоҷикистон Эмомалӣ Раҳмон изҳор намуд, ки Тоҷикистон мехоҳад робитаҳои муфидро бо Ҷумҳурии Маҷористон ривоҷу таҳким бахшад. Қайд шуд, ки имрӯз муомилоти савдои берунии байни Тоҷикистону Маҷористон аз 30 то 80 миллион доллари ИМА-ро ташкил медиҳад. Тарафҳо изҳори ақида намуданд, ки ин ҳадди имкониятҳои ду кишвар барои рушди савдои муфид, мубодилаи амвол ва татбиқи онҳо нест.
Тарафҳо дар бораи ривоҷи робитаҳои иқтисодӣ сухан ронда, барқарор намудани робитаҳои шахсии байни тоҷирони ҳар ду кишвар ва ба ин муносибат доир намудани мулоқотҳои тоҷиронро ба мақсад мувофиқ донистанд.
Тарафҳо ҳамчунин дар бораи проблемаҳои сиёсию иқтисодии дорои хусусияти минтақавию байналмилалӣ мубодилаи афкор намуданд. Дипломати Маҷористон зикр намуд, ки Маҷористон ҳамчун узви фаъоли Иттиҳоди Аврупо робитаҳои Тоҷикистонро бо Иттиҳоди Аврупо пурра дастгирӣ менамояд. "Мо моҳи октябри соли гузашта аз тарафи Тоҷикистон имзо шудани Созишномаи ҳамкорӣ бо Иттиҳоди Аврупоро маъқул медонем, зеро ин имконияти нави рушди муносибатҳои дуҷонибаи на фақат байни мамлакатҳои аъзои Иттиҳоди Аврупо, балки байни Маҷористону Тоҷикистонро низ фароҳам меорад", - гуфт Миклош Ятскович.