13 июл Президенти Ҷумҳурии Тоҷикистон Эмомалӣ Раҳмон бо ҳамраиси Комиссияи муштараки ҳамкории Тоҷикистон ва Эрон, вазири бозаргонии Ҷумҳурии Исломии Эрон Муҳаммади Шариатмадорӣ мулоқот кард.

Дар ҷараёни мулоқот ҷонибҳо масъалаи ҳамкориҳои иқтисодӣ ва ҳамоҳангсозии кори Комиссияи муштараки ҳамкории Тоҷикистон ва Эронро баррасӣ намуда, густариш ва таҳкими ҳамаҷонибаи равобит ва ҳамкории байни кишварҳоро аз самтҳои муҳимтарини сиёсати хориҷии Ҷумҳурии Тоҷикистон ва Ҷумҳурии Исломии Эрон арзёбӣ намуданд.

Президенти Ҷумҳурии Тоҷикистон Эмомалӣ Раҳмон изҳор намуд, ки равобити наздик ва ҳамкории васеи сатҳи имрӯза тақозои табиии кишварҳои ҳамзабону ҳамфарҳанг ва манфиатҳои асосан муштараки минтақавӣ ва байналмилалии мост.

Дар мулоқот қайд карда шуд, ки Ҷумҳурии Исломии Эрон метавонад дар татбиқи барномаи сохтмони нерӯгоҳҳои кӯчак ва миёна, навсозии шабакаҳои барқӣ, сохтмони корхонаҳои тавлиди маснуоти барқӣ ва умуман тақвияти нерӯи барқии Тоҷикистон мусоидати дӯстона намояд, ки на фақат барои Тоҷикистон, балки барои ҳамаи кишварҳои минтақа бахусус, Афғонистони ҷангзада аҳамияти ҳаётӣ хоҳад дошт.