15 июл Президенти Ҷумҳурии Тоҷикистон Эмомалӣ Раҳмон бо муовини Президенти Ҷумҳурии Исломии Эрон, Раиси Созмони тарбияи бадани ҶИЭ Мӯҳсин Меҳрализода мулоқот кард.
"Ба андешаи ман,- изҳор дошт Эмомалӣ Раҳмон, - равобити наздики дӯстона ва ҳамкории ҳамаҷонибаи Тоҷикистон ва Эрон ин тақозои табиии сарнавишти таърихӣ, муштаракот ва пайвандҳои зиёди мо, рӯҳи ниёгони бузургамон, иродаи халқҳои ҳарду кишвари бародар аст".
Президенти Тоҷикистон Эмомалӣ Раҳмон пешниҳод намуд, ки бояд барномаи амалии ҳамкории ду кишварро дар соҳаи варзиш ва тарбияи ҷисмонӣ таҳия ва татбиқ намоем, ки ҳам ба нафъи солимии бадан ва рӯҳи миллатҳои мост ва ҳам барои тарбияи варзишгарони касбии сатҳи минтақавӣ ва байналмилалӣ мусоидати фаъол хоҳад намуд.
Ҷонибҳо ба тавсеа ва рушди соҳаҳои имрӯзӣ ва маъмули варзиши ҷаҳонӣ низ таваҷҷӯҳ зоҳир намуданд.
Дар мулоқот ба масъалаи сулҳу субот, амният ва ҳамкории васеи минтақавӣ низ дахл карда, ҳарду ҷониб ҳамкории васеи минтақавиро омили ниҳоят муҳимми таъмин ва тақвияти субот дар минтақа донистанд.