7 ноябр Президенти Ҷумҳурии Тоҷикистон Эмомалӣ Раҳмон Президенти Бонки Осиёии Рушд Харухико Куродаро, ки бо сафари корӣ дар Тоҷикистон қарор дорад, ба ҳузур пазируфт.

Президенти Ҷумҳурии Тоҷикистон Эмомалӣ Раҳмон Харухико Куродаро ба муносибати ба мақоми Президенти Бонки Осиёии Рушд интихоб шуданаш табрику таҳният гуфта, иброз дошт, ки Ҷумҳурии Тоҷикистон ба масоили ҳамкориҳои мутақобилан судманд бо ин институти бонуфузи молиявии байналмилалӣ таваҷчӯҳи хос зоҳир мекунад.

Дар мулоқот масоили ҷорӣ ва дурнамои рушду нумӯи муносибатҳои судбахши Тоҷикистон ва Бонки Осиёии Рушд мавриди муҳокима қарор гирифт.

Ҷонибҳо зимни сӯҳбати тӯлонию пурсамар атрофи ҳамкориҳои Тоҷикистону Бонки Осиёии Рушд дар соҳаҳои иқтисод, молия, энергетика, нақлиёт, роҳсозӣ, саноати кишоварзӣ, бартараф намудани оқибатҳои офатҳои табиӣ ва дар соҳаи иҷтимоиёт мубодилаи афкор намуданд.

Сарвари давлати Тоҷикистон Эмомалӣ Раҳмон саҳми Бонки Осиёии Рушдро арзишманду муассир арзёбӣ намуда, изҳори умед кард, ки минбаъд ҳамкориҳои судбахши Тоҷикистон бо ин институти молиявии байналмилалӣ боз ҳам рушду камол меёбад, чунки дар ҷумҳурии мо имрӯз тамоми шароитҳои зарурӣ барои тараққиёти иқтисодию иҷтимоӣ фароҳам омада, фазои мусоиди инвеститсионӣ таъмин гаштааст.

Ҷонибҳо иброз доштанд, ки бо рушду такомули ҳамкориҳои мутақобилан судманд мо метавонем ба паст кардани сатҳи камбизоатӣ дар Тоҷикистон ва расидан ба Ҳадафҳои Рушди Ҳазорсола ҳарчи зудтар муваффақ гардем.