Президенти Ҷумҳурии Тоҷикистон Эмомалӣ Раҳмонов роҳбарони як қатор мақомоти назди вазорату идораҳои ҷумҳуриро ба вазифаҳо таъин намуд.

Сарвари давлати Тоҷикистон Эмомалӣ Раҳмонов қабл аз амалӣ намудани таъиноти кадрӣ бо нафарони ба вазифаҳои пурмасъули роҳбарияти мақомоти назди вазорату идораҳои мамлакат таъиншаванда бо иштироки роҳбарони вазоратҳои дахлдор сӯҳбат доир намуд.

Президенти Ҷумҳурии Тоҷикистон Эмомалӣ Раҳмонов зимни сӯҳбат таъкид дошт, ки марҳилаи навини рушди иҷтимоию иқтисодии Тоҷикистон ва вазифаҳои барои ин даврон муайяншуда, ки пеш аз ҳама ба баланд бардоштани сатҳу сифати зиндагии мардум равона гаштаанд, аз роҳбарони тамоми зинаҳои мақомоти ҳокимияти давлатӣ ва ҳар як фарди баору номуси кишвар заҳмати шаборӯзиро ба манфиати давлату миллати хеш тақозо мекунад.

Сарвари давлат Эмомалӣ Раҳмонов бо назардошти ин масъулияти гарон аз кадрҳои ба вазифаҳои муҳимми давлатӣ таъиншаванда бо дасту дили пок ва бо садоқат ба халқу Ватан заҳмат кашиданро талаб намуд.

Кадрҳои ба вазифаҳои мазкур таъиншаванда ба Президенти Ҷумҳурии Тоҷикистон Эмомалӣ Раҳмонов қавл доданд, ки барои инкишофу пешрафти босуботи кишвар ва таъмини зиндагии шостаи мардуми Тоҷикистон дар мӯҳлатҳои муайяншуда тамоми донишу маҳорат ва нерӯю тавоноии худро равона хоҳанд кард.