Президенти Ҷумҳурии Тоҷикистон Эмомалӣ Раҳмонов Вазири омӯзишу парвариши Ҷумҳурии Исломии Эрон Маҳмуди Фаршедиро ба ҳузур пазируфт.
Дар мулоқот масоили ҳамкориҳои гуногунҷабҳаи Тоҷикистону Эрон, хусусан дар соҳаҳои маориф ва илму фарҳанг мавриди баррасӣ қарор гирифт.
"Таъмини равобити дӯстона ва ҳамкории ҳамаҷониба бо Ҷумҳурии Исломии Эрон аз самтҳои муҳимтарини стратегияи минтақавӣ ва байналмилалии Ҷумҳурии Тоҷикистон аст", изҳор дошт зимни сӯҳбат Сарвари давлати Тоҷикистон Эмомалӣ Раҳмонов.
Президенти Ҷумҳурии Тоҷикистон Эмомалӣ Раҳмонов ҳамчунин барои чопи 400 ҳазор нусха китобҳои дарсии мактабҳои таҳсилоти ҳамагонӣ ва ҷудо намудани 100 квота барои таҳсили ҷавонони Тоҷикистон дар муассисаҳои олии таълимии Ҷумҳурии Исломии Эрон ба роҳбарияти ин давлати дӯсту ҳамзабон изҳори сипос намуд.
Мусоҳибон оид ба самтҳои гуногуни ҳамкориҳои таҳсилотӣ, илмию адабӣ ва фарҳангӣ мубодилаи афкор намуданд.
Президенти Ҷумҳурии Тоҷикистон Эмомалӣ Раҳмонов оид ба наздиксозии стандартҳои таълим ва таҳсилот, ҳамгунсозии истилоҳоти фаннӣ ва тахассусӣ, ворид сохтани забони тоҷикӣ ё форсӣ дар шабакаҳои Интернет ва низоми муосири иттилоотӣ, ҳамкорӣ дар тарбияи мутахассисон ва кадрҳои илмӣ бар асоси меъёрҳои пешрафтаи ҷаҳонӣ ва таҷрибаи арзишманди худӣ як қатор пешниҳодҳои муфид ба миён гузошт, ки мавриди дастгирӣ қарор гирифтанд.
Ҷонибҳо ҳамчунин оид ба ҳамкории судбахши минтақавӣ дар самтҳои мазкур аз ҷумла байни Тоҷикистон ва Афғонистону Эрон, ки се кишвари ҳамзабону дорои умумиятҳои зиёди фарҳангианд, мубодилаи судманди афкор карда, омодагӣ ва ҳавасмандии худро бори дигар таъкид намуданд.