Пагоҳии рӯзи 13 май Президенти Ҷумҳурии Тоҷикистон Эмомалӣ Раҳмон дар қароргоҳи муваққатии худ дар Исломобод бо вазири молияи Покистон Шавкат Азиз мулоқот кард.
Президенти Ҷумҳурии Тоҷикистон Эмомалӣ Раҳмон дар оғози сӯҳбат ёдовар шуд, ки Президенти Ҷумҳурии Исломии Покистон Парвиз Мушарраф бо назардошти равобити дӯстона ва мушкилоти ҷории кишвари мо қарзи қаблан гирифта ва истифоданамударо ба маблағи 13 миллион доллар ба грант мубаддал карданд, ки мо аз ин ҳусни ният ва иқдоми дӯстонаи эшон ва Ҳукумати Покистон сипосгузор ҳастем.
Ҷонибҳо ба масъалаи ҳамкориҳои дуҷониба дар соҳаи гидроэнергетика, ба хусус ба мавзӯи сохтмони нерӯгоҳи барқии обии Роғун мароқи бештар зоҳир намуданд.
Кайд гардид, ки дар ин сохтмон то ҳол беш аз 800 миллион доллар ба масраф расида, қисмати муҳими корҳо иҷро гардидааст. Мутахассисони соҳибихтисос, нерӯи кории арзон, ашё ва воситаҳои зарурӣ мавҷуданд.
Мо тарҳи нави бунёди марҳила ба марҳилаи ин нерӯгоҳро омода намудаем ва амалӣ мекунем, зикр намуд сарвари давлати Тоҷикистон. Барои итмоми марҳилаи аввал ҳудуди 600 миллион доллар зарур аст. Хароҷоти он дар чаҳору ним сол ба даст меояд ва идомаи сохтмон бо фоидаи худи объект имконпазир аст.
Таъкид ёфт, ки Вазорати молияи Ҷумҳурии Исломии Покистон метавонад дар созмондиҳии консортсиум ва ҷалби сармояи зарурӣ нақши муҳим иҷро намояд.
Ҳамзамон ҷонибҳо ҳамкории дутарафаро дар бунёди корхонаҳои муштарак дар Тоҷикистон амри муҳим ва аз ҷиҳати иқтисодӣ фоидаовар, ҷалбу ташвиқи сармоягузорӣ, таҳия ва татбиқи барномаҳои инвеститсионӣ, ҳалли масоили арзӣ, пардохтӣ ва масоили дигари молиявиро ба ҳар ду кишвар манфиатовар маънидод намуданд.