19 май Президенти Ҷумҳурии Тоҷикистон Эмомалӣ Раҳмон Сафири Фавқулодда ва Мухтори Ҷумҳурии Исломии Эрон Носир Сармади Порсоро ба ҳузур пазируфт.
Дар мулоқот асосан масъалаҳои вобаста ба ҳамкориҳои иқтисодии Ҷумҳурии Тоҷикистон бо Ҷумҳурии Исломии Эрон баррасӣ шуданд.
Ҷумҳурии Тоҷикистон,-изҳор дошт Эмомалӣ Раҳмон, - аз инкишофи ҳамкориҳои иқтисодию тиҷоратии солҳои охир бо Ҷумҳурии Исломии Эрон қаноатманд аст, вале то ҳол имкониятҳои васеи робитаҳои дуҷониба комилан истифода нашудаанд. Дар вохӯрӣ тазаккур дода шуд, ки бо таъсиси консорсиуми байналмилали ҷиҳати сохтмони неругоҳи барқии обии Сангтуда ва ҳамдастии мутахассисони Эронӣ дар сохтмони тунели Анзоб дар ҳамкориҳои дуҷониба марҳилаи сифатан боварибахшу созанда оғоз ёфт.
Президенти Ҷумҳурии Тоҷикистон Эмомалӣ Раҳмон аз имконоти фаровони ҳамкориҳои иқтисодӣ, ба хусус таъсиси корхонаҳои муштараки коркарди зироатҳои кишоварзӣ ва канданиҳои фоиданоки зеризаминӣ ёдрас шуда, таъкид сохт, ки тавсеаи робитаҳои дуҷониба асоси манфиат ва хоҳишҳои рузафзуни мардуми дусту бародари тоҷику эронӣ мебошад.
Ҷонибҳо атрофи як қатор масълаҳои фарогири робитаҳои иқтисодию тиҷоратӣ, авзои минтақа, саҳмгирӣ дар марҳилаи барқарорсозии давлати Афғонистон ва дигар мавзӯоти мавриди таваҷҷӯҳи тарафҳо табодули назари судманд доштанд.