30 июн бо мақсади паст кардани сатҳи камбизоатӣ ва баланд бардоштани ҳавасмандии моддии омӯзгорони муассисаҳои таҳсилоти умумӣ бо Қарори Ҳукумати Ҷумҳурии Тоҷикистон Нақшаи татбиқи ислоҳоти соҳаи маориф барои солҳои 2004- 2009 тасдиқ карда шуд, ки мувофиқи он аз 1 сентябри соли 2004 меъёри сарбории таълимию омӯзгорӣ барои муаллимони синфҳои 1-4 18 соат дар як ҳафта ва синфҳои 5-11 16 соат дар як ҳафта муқаррар карда шудааст.

Шарҳи Котиби матбуоти Президенти Ҷумҳурии Тоҷикистон :

Ба Вазорати маорифи Ҷумҳурии Тоҷикистон супорида шуд, ки то 1 сентябри соли 2004 ба нақшаи таълимии муассисаҳои таҳсилоти умумӣ, бо назардошти кам кардани соатҳои омӯзиш, тағйирот ворид намояд. Аз 1 сентябри соли 2004 бошад вобаста ба тағйирот дар нақшаи таълимӣ ва зиёд шудани сарбории таълимии амалкунанда музди меҳнати  омӯзгорони муассисаҳои таҳсилоти умумӣ ба андозаи 25 % баланд бардошта мешавад. Шумораи умумии кормандони соҳаи маориф аз ҳисоби ҷойҳои холӣ 5 % ихтисор мегардад.

Вазорати маорифи Ҷумҳурии Тоҷикистон дар якҷоягӣ бо Вазорати молияи Ҷумҳурии Тоҷикистон, вазорату идораҳо, мақомоти маҳаллии ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо вазифадор гардиданд, ки иҷрои қарори мазкурро дар доираи фонди музди меҳнати муассисаҳои таҳсилоти умумӣ аз ҳисоби маблағҳои сарфашудае, ки бо назардошти кам кардани соатҳои омӯзиш ва зиёд шудани сарбории таълимию омӯзгорӣ ба вуҷуд омадааст, таъмин намоянд.