Нимаи дуюми рӯзи 31 август Президенти Ҷумҳурии Тоҷикистон Эмомалӣ Раҳмон ба муносибати солгарди навбатии ҷашни истиқлолияти Ҷумҳурии Ӯзбекистон ба унвони Президенти ин мамлакат Ислом Каримов барқияи шодбош фиристод, ки дар он гуфта мешавад: «Ислом Абдуғаниевичи мӯҳтарам, Шумо ва тамоми халқи ӯзбекро ба муносибати ҷашни солгарди истиқлолияти Ҷумҳурии Ӯзбекистон самимона табрик менамоям.
Тоҷикистон барои истифодаи имкониятҳои бузурги боз ҳам бештар ривоҷ ёфтани муносибатҳои дӯстона, ҳусни ҳамҷаворӣ ва ҳамкории мутақобилан муфиди мамлакатҳоямон аз тамоми имкониятҳо истифода хоҳад бурд, ки таърихи ҳазорсола доранд.
Боварии комил дорам, ки муносибатҳои давлатҳои мо дар оянда ҳам ба манфиати сулҳу субот ва пешрафти ҷомеаи ҳар ду кишвар бештар аз пештар равнақу ривоҷ меёбанд. Ба Шумо саломатии комил, барори кор ва ба халқи мамлакататон сулҳу осоиш ва рӯзгори фараҳмандона орзу менамоям».