2 октябр Президенти Ҷумҳурии Тоҷикистон Эмомалӣ Раҳмон ба унвони Президенти Ҷумҳурии Федеролии Олмон Хорст Кёлер барқияи шодбош фиристод, ки дар он аз ҷумла гуфта мешавад: «Ҷаноби Аълоҳазрат, шуморо ва халқи Олмонро аз номи халқ ва Ҳукумати Ҷумҳурии Тоҷикистон бо камоли қаноатмандӣ ба муносибати Рӯзи ваҳдати мамлакататон самимона табрик менамоям.
Тоҷикистон муносибатҳои шарикиро бо Олмон қадр менамояд ва мо азми қавӣ дорем, ки ҳамкории самарабахшро дар ҳамаи самтҳо собитқадамона ривоҷ диҳем. Боварӣ дорам, ки дар натиҷаи ҷидду ҷаҳди ҳар ду ҷониб муносибатҳо ва ҳамкории Тоҷикистону Олмон бештар ривоҷ ёфта, соҳаҳои навро фаро мегиранд.
Ҷаноби Президент, ба Шумо саломатии бардавом, барори кор ва ба халқи мамлакататон пешрафту ободӣ орзу менамоям».