Нимаи дуюми рӯзи 7 октябр Президенти Ҷумҳурии Тоҷикистон Эмомалӣ Раҳмон Вазири иттилооти Ҷумҳурии Исломии Эрон Алӣ Юнусиро, ки барои боздиди корӣ ба шаҳри Душанбе омад, ба ҳузур пазируфт. Дар ҷараёни сӯҳбат зикр шуд, ки Тоҷикистон ба таҳкими ҳамкории ба ҳам муфид ва ҳамаҷонибаи миёни Тоҷикистону Эрон аҳамияти ҷиддӣ медиҳад. Тарафҳо вазъи ҳозираи ҳамкории Тоҷикистону Эронро дар соҳаҳои сиёсат, фарҳанг ва иқтисод бо камоли қаноатмандӣ қайд намуданд.
Эмомалӣ Раҳмон ва Алӣ Юнусӣ аз рӯи масъалаҳои амнияти минтақавӣ ва байналмилалӣ мубодилаи муфассали афкор намуданд. Онҳо зикр карданд, ки сулҳи бардавом ва рушди иқтисодиёти Афғонистони ҳамсоя ба нафъи миллии он мебошад.
Мусоҳибон дар бораи ҳамкории дуҷониба дар соҳаи амният сухан ронда, бо камоли қаноатмандӣ қайд намуданд, ки ҳар ду тараф ҳанӯз якчанд сол пеш дар роҳи муборизаи муштараки зидди терроризми байналмилалӣ қадамҳои аввал гузошта буданд.
Дар ҷараёни сӯҳбат қайд карда шуд, ки ҳамкории Тоҷикистону Эрон дар ин самт таҳкурсии муҳимми таъмини амнияти минтақаи Осиёи Марказиро мегузорад. Мусоҳибон ба ин муносибат иброз доштанд, ки мавқеъҳояшон дар бобати таъмини амнияти минтақа як хел аст.