Субҳи рӯзи 20 ноябр дар майдони «Дӯстӣ»-и пойтахт ба шарафи ҷашни 80-солагии пойтахти Тоҷикистон – шаҳри Душанбе карнавали бошукуҳи идона баргузор гардид. Дар он Президенти Ҷумҳурии Тоҷикистон Эмомалӣ Раҳмон, Раиси Маҷлиси Миллии Маҷлиси Олии Ҷумҳурии Тоҷикистон, раиси шаҳри Душанбе Маҳмадсаид Убайдуллоев, раиси шаҳри Москва Юрий Лужков ва меҳмонони сершумор ширкат варзиданд.

Баъди маросими ифтитоҳ бо қувваи намояндагони корхонаю ташкилотҳои пойтахт ва донишҷӯёну талабагони мактабҳо карнавали назаррабо намоиш дода шуд. Дар ҷараёни он ҳамаи давраҳои таърихии тараққиёти шаҳр, дастовардҳои санъати қадимаю имрӯза ва рақсу сурудҳои халқи тоҷик ва халқҳои ҷаҳон, рақси ниқобпӯшон ва бозиҳои қадимаи Шарқӣ намоиш дода шуданд. Дар ҷамъомад комёбиҳои бадастовардаи корхонаҳои саноатии мамлакат пешкаши тамошобинон гардонда шуд.