7 июн дар шаҳри Санкт-Петербург ҷаласаи Сарони давлатҳои узви СҲШ дар ҳайати махдуд оғоз ёфт. Дар он Президенти Ҷумҳурии Тоҷикистон Эмомалӣ Раҳмон иштироки фаъолона дошт.
Дар Қасри мармарии шаҳри Санкт-Петербург мулоқоти Сарони давлатҳо дар ҳайати васеъ идома ёфт. Президентҳо масъалаҳои рӯзмарраи ташаккули механизмҳои фаъолияти СҲШ, инкишофи минбаъда ва тавсеаи ҳамгироии бисёрҷонибаро дар доираи СҲШ ва проблемаҳои вазъияти байналмилалии муосирро муҳокима карданд.
Дар суханронии худ, ки бо вокуниши мусбат пазируфта шуд, Президенти Ҷумҳурии Тоҷикистон Эмомалӣ Раҳмон имзои Созишнома дар бораи таъсиси Сохтори минтақавии зиддитеррористиро чун такомули чорчӯбаи ҳуқуқӣ ва ба сатҳи амалӣ бардоштани масъалаҳои ҳамкорӣ дар мубориза бар зидди терроризм, эктремизм ва ҷудоихоҳӣ арзёбӣ намуд.
Дар Саммит Сарони давлатҳо санади СҲШ, Созишнома дар бораи таъсиси Сохтори минтақавии зиддитеррористӣ ва Эъломияи муштаракро имзо карданд.