24 июл Президенти Ҷумҳурии Тоҷикистон Эмомалӣ Раҳмон баъди боздид аз ноҳияи навтаъсиси Кӯҳистони Мастчоҳ ба хотири шиносоӣ ба рафти корҳои бартараф намудани оқибати офати табиӣ ва ҷобаҷокунии оилаҳои бар асари он зарардида ба деҳаи Дашти Қозии ноҳияи Айнӣ омад.
Сардори давлат ба ҷараёни ҷобаҷокунӣ ва таъмини аҳолӣ бо шароитҳои зиндагӣ мароқ зоҳир намуд. Дар ин ҷо барои бунёди манзил 78 гектар замин ҷудо карда шуда, дар ин мавзеъ 280 хоҷагӣ бояд ҷойгир кунонда шаванд. Президенти ҷумҳурӣ бо вазъият бевосита шинос гардида, дар бобати ба таҳсил фаро гирифтани бачагон, сохтмони мактаб, бунгоҳи тиббӣ, бунёди роҳҳо ба роҳбарияти вазорату идораҳо ва шахсони масъул супоришҳои мушаххас дод.
Вазоратҳои дахлдор вазифадор гардиданд, ки ҷиҳати таъмини саривақтии зарардидагон бо маводҳои лозимаи рӯзгор чораҳои қатъӣ андешанд.
Сарвари давлат дастур дод, ки бояд баъди 4-5 сол мавзеи мазкур ба як маҳаллаи ободу зебо тадбил ёбад.
Президенти Ҷумҳурии Тоҷикистон Эмомалӣ Раҳмон баъди анҷоми сафари корӣ аз вилояти Суғд худи ҳамон рӯз ба шаҳри Душанбе баргашт.