29 ноябри соли 2002 таҳти раёсати Президенти Ҷумҳурии Тоҷикистон Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид.
Пас аз баррасаии масъалаи кадрҳо, силсилаи лоиҳаи қонунҳо маъқул дониста шуд, ки ба муҳокимаи парлумони мамлакат пешниҳод гардид.
14 масъалаи рӯзнома ба муносибатҳои дуҷонибаю бисёрҷонибаи Тоҷикистон бо мамлакатҳои дигар ва фаъолияти байналхалқии он марбут мебошанд. Аз ҷумла дар арафаи сафари расмии Президенти Ҷумҳурии Тоҷикистон Эмомалӣ Раҳмон ба Фаронса дар маҷлиси Ҳукумат лоиҳаҳои созишномаҳои байни Ҳукумати Ҷумҳурии Тоҷикистон ва Ҳукумати Ҷумҳурии Фаронса муҳокима ва маъқул дониста шуданд.
Дар маҷлис масъалаҳои дорои аҳамияти калони иҷтимоию иқтисодӣ, тасдиқи Барномаҳои муҳоҷирати коргарон аз Ҷумҳурии Тоҷикистон ба мамлакатҳои дигар барои солҳои 2003 - 2005 муҳокима карда шуд.