Сипас ҷиҳати шиносоӣ бо таҷрибаи пешқадами деҳқонону мутахассисони соҳаи кишоварзии Тоҷикистон Сарвари давлати мо Эмомалӣ Раҳмон ва Амири Давлати Қатар Шайх Ҳамад ибни Халифа Оли Сонӣ ба ноҳияи Ҳисор ташриф оварданд.

Аҳли заҳмати хоҷагӣ ва боғутокпарварони асил меҳмонони олимақомро бо табъи болида ва сарфарозӣ аз ташрифи эшон истиқбол гирифтанд.

Дар ангурбоғи хоҷагии "Баракат"-и ноҳияи Ҳисор Сарварони ду давлат Эмомалӣ Ра?мон ва Шайх Ҳамад ибни Халифа Оли Сонӣ ба таҷрибаи пешқадами ангӯрпарварон ва навъҳои гуногуни ангӯри хушлаззат аз қабили "ҳусайнӣ", "ҷавз", "кишмиш", "тоифӣ" ва ғайра таваҷҷӯҳ зоҳир намуданд.

Дар ҳамин хоҷагӣ онҳо ҳамчунин галлаю рамаи аспу гӯсфандро мушоҳида карда, оид ба роҳҳои фоидаовари ҳамкорӣ дар бахши чорводорӣ ва истеҳсолу коркарди гӯшту шир мубодилаи афкор намуданд.

Аз табъи болида ва хушҳолии меҳмони олимақом - Амири Давлати Қатар Шайх Ҳамад ибни Халифа Оли Сонӣ ҳувайдо буд, ки табиати биҳиштосои Тоҷикистон ва неъматҳои биҳиштии он ба ӯ бисёр писанд омад ва ин табиист, зеро ки иқлим ва релефи кишвари кӯҳистони мо аз боду ҳавои ниҳоят гарм ва шароити регистони нимҷазираи Араб куллан фарқ мекунад.

Бо ҳамин фазои фораму эҳсоси дӯстию бародарӣ ва омодагии устувор баҳри ташкил ва густариш додани ҳамкориҳои судбахш нахустин сафари расмии Амири Давлати Қатар Шайх Ҳамад ибни Халифа Оли Сонӣ ба Ҷумҳурии Тоҷикистон анҷом ёфт.

Дар фурӯдгоҳи шаҳри Душанбе меҳмони олимақом - Амири Давлати Қатар Шайх Ҳамад ибни Халифа Оли Сониро, ки дирӯз бо сафари расмии ҷавобӣ ба Ҷумҳурии Тоҷикистон ташриф оварда буд, Сарвари давлати Тоҷикистон Эмомалӣ Раҳмон ва дигар шахсони расмӣ гусел намуданд.

Ба ифтихори меҳмони олимақом дар фурӯдгоҳи пойтахт парчамҳои давлатии Тоҷикистону Қатар афрохта шуда, горди фахрии Ҷумҳурии Тоҷикистон саф ороста буд.

Бояд тазаккур дод, ки Амири Давлати Қатар Шайх Ҳамад ибни Халифа Оли Сониро дар ин сафар ҳамсараш - Шайха Муза, ки дар ҳаёти иҷтимоию сиёсии кишвари худ мақому манзалати баланд ва нақши намоён дорад, ҳамроҳӣ намуд.

Амири Давлати Қатар Шайх Ҳамад ибни Халифа Оли Сонӣ бо табъи болидаю тассуроти хуш аз сафари дурӯзаи худ ба Ҷумҳурии Тоҷикистон аз Душанбе ҷиҳати густариш додани ҳамкориҳо бо кишвари дигари мусулмонӣ - Ҷумҳурии Озарбойҷон ба шаҳри Боку сафар кард.