Президенти Ҷумҳурии Тоҷикистон

Боздид аз намоишгоҳи дастовардҳои корхонаҳои истеҳсолии ноҳияи Файзобод

20.09.2019 09:07, ноҳияи Файзобод

20 сентябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Файзобод аз намоишгоҳи дастовардҳои корхонаҳои истеҳсолӣ боздид намуданд.

Дастовардҳои аҳли заҳмати ноҳияи Файзобод имсол дар ҳама бахшу соҳаҳо аз ҷумла, боғдорӣ, зироаткорию сабзавоткорӣ, чорводориву парандапарварӣ, истеҳсоли молу маҳсулоти тару тозаи табиӣ назаррас буда, деҳқонони асил бо тавлиди маҳсулоти аз лиҳози экологӣ тоза дар ғанӣ гардидани бозори истеъмолӣ ва фаровонии дастархони сокинони ноҳия ва ҷумҳурӣ саҳми босазо доранд.

Корхонаҳои саноатии ноҳия дар ҳашт моҳи соли ҷорӣ ба маблағи умумии 22 миллиону 258 ҳазор сомонӣ маҳсулот истеҳсол ва коркард карда, барои фурӯш ба бозори истеъмолӣ пешниҳод намудаанд.

Аснои шиносоӣ бо дастовардҳои меҳнаткашони ноҳияи Файзобод Пешвои муаззами миллат муҳтарам Эмомалӣ Раҳмон ба роҳбарону хоҷагидорон дар самти истифодаи босамари замин, истеҳсоли молу маҳсулоти босифати ватанӣ, ҷамъоварии гулу гиёҳои шифобахш ва коркарди он дастуру супоришҳои мушаххас доданд.

Бо мақсади таъмини амнияти озуқаворӣ ва фаровонии бозорҳо аҳли заҳмати ноҳия аз ҳарвақта дида бештар талош доранд. Дар намоишгоҳ маҳсулоти истеҳсолкардаи Корхонаи парандапарварии Ҷамъияти дорои масъулияти маҳдуди “Ганҷи Ҳилол”, ки самти фаъолияташ истеҳсоли тухм ва гӯшти мурғ мебошад, пешниҳод гардид. Айни замон дар корхонаи мазкур 591 ҳазору 711 сар паранда парвариш карда шуда, дар ҳашт моҳи соли равон, аллакай, 58 миллиону 590 ҳазор дона тухм истеҳсол гардидааст. Бо истеҳсоли 32 миллион дона тухми дигар то охири сол бештар аз 90 миллион дона тухи истеҳсол хоҳад шуд. Дурнамои истеҳсоли тухм давоми се соли оянда то таҷлили 30-солагии Истиқлолияти давлатии Ҷумҳурии Тоҷикистон ба 200 миллион дона расонида мешавад. Дар ин давра бо афзоиш додани иқтидори истеҳсолӣ ва таъсиси ҷойҳои нави корӣ шумораи кормандони Корхонаи парандапарварии Ҷамъияти дорои масъулияти маҳдуди “Ганҷи Ҳилол” аз 480 ба 1000 нафар расонида мешавад.

Кормандони Муассисаи давлатии хоҷагии ҷангали ноҳияи Файзобод дар баробари ҳифзи олами бойи ҳайвоноту набототи нодир инчунин дар самти бунёд, барқарорсозӣ ва нигоҳубини ҷангалзор фаъолияти назаррас дошта, дар намоишгоҳ дастовардҳои худро пешниҳод намуданд. Гӯшаи дастовардҳои ин ниҳодро намунаҳо аз меваҳои тухмдору донакдор, хушкмева, чормағз, бодоми талх, хуч, ғалладонагиҳо ва гиёҳҳои шифобахш дар бар мегирад. Кормандони муассисаи мазкур дар мавсими имсола 300 кило гулу гиёҳҳои шифобахш ҷамъоварӣ кардаанд.

Дар ноҳия дар баробари рушди бахшҳои соҳаи кошоварзӣ парвариши занбури асал низ васеъ ба роҳ монда шуда истеҳсоли асал нисбат ба солҳои қаблӣ ба маротиб афзун карда мешавад. Дар ҳашт моҳи соли равон аз 7 ҳазору 705 оилаи занбӯри асал 62 тонна маҳсулоти тозаи табиӣ истеҳсол гардидааст. Яке аз хоҷагиҳои занбӯриасалпарвари ноҳия Ҷамъияти дорои масъулияти маҳдуди “Ҳоҷӣ Шариф” мебошад, ки соли 2004 таъсис ёфтааст ва танҳо тӯли ду соли охир хоҷагӣ 12 тонна асали хушсифат истеҳсол кардааст.

Дар намоишгоҳ маҳсулоти нонӣ, аз қабилӣ кулчаю қалама, чапотӣ, фатири гардхел, чор навъи нони армуғонӣ, ва дигар намуди маҳсулоти нонӣ пешниҳод гардид, ки аз ҳунару маҳорати баланди кадбонуҳои заҳматпешаи ноҳияи Файзобод мебошад.

Сарвари давлат муҳтарам Эмомалӣ Раҳмон дар намоишгоҳ аз дастовардҳои меҳнатии аҳли заҳмати ноҳияи Файзобод шиносоӣ пайдо карда, барои афзун намудани иқтидори истеҳсолии корхонаҳои саноатӣ, рушди бахшҳои соҳаи кишоварзӣ ва ободу зебо намудани ҳар як гӯшаи ватани азизамон ба сокинони меҳнатқарини ноҳия ҳидоятҳои судманд доданд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520