Президенти Ҷумҳурии Тоҷикистон Эмомалӣ Раҳмон бо масъулини Ҳукумати мамлакат ва Дастгоҳи иҷроияи Сарвари давлат, роҳбарони як қатор вазорату идораҳо ва дигар шахсони масъул машварати корӣ доир намуд.

Дар машварат масоили таъминоти аҳолӣ бо нерўи барқ, рафти татбиқи лоиҳаҳои энергетикию роҳсозӣ, омодагӣ ба киштукори баҳорӣ ва вазъи таълиму тарбия дар муассисаҳои таълимӣ баррасӣ шуд.

Сарвари давлат Эмомалӣ Раҳмон ба масъулин дастур дод, ки вазъи таъминоти аҳолӣ ва корхонаҳои саноатӣ бо нерўи барқ таҳти назорати доимӣ гирифта шавад. Таъкид гардид, ки барои кори босамари корхонаҳои саноатӣ бояд ҳеҷ гуна монеа набошад. Супориш дода шуд, ки суръат ва сифати лоиҳакашӣ ва сохтмони нерўгоҳҳои хурду бузург, аз ҷумла Роғун, Сангтўда – 2, Нуробод – 1, Нуробод – 2 ва Шўроб, маркази нави барқу гармидиҳии шаҳри Душанбе, хатҳои байниноҳиявии интиқоли нерўи барқ ва 4 корхонаи нави ресандагӣ дар ноҳияҳои Мастчоҳ, Зафаробод, Ёвон ва Бохтар баланд бардошта шавад. Роҳбарони сохторҳои дахлдор вазифадор шуданд, ки баҳри тезондани корҳои ҷустуҷўию пармакунӣ ва истихроҷи газ тадбирҳои муассир андешанд.

Супоришҳои мушаххас ҳамчунин доир ба тезондани сохтмону навсозии роҳҳои мошингарди Кўлоб-Қалъаи Хумб, Қурғонтеппа- Дўстӣ ва Душанбе- Данғара дода шуд.

Роҳбарияти вазорати маориф вазифадор шуд, ки баҳри муҳайё намудани шароити хуби таълиму тарбия баъди таътили зимистонаи хонандагон тадбирҳо андешанд.

Дар назди масъулини дахлдор ҳамчунин оид ба омодагӣ ба киштукори баҳорӣ, дастрас кардани тухмиҳои серҳосил, вусъат додани ниҳолпарварӣ, бунёди боғҳои наву барқарорсозии боғҳои кўҳна ва доир ба дигар корҳои зарурӣ вазифаҳои мушаххас гузошта шуд.