Президенти Ҷумҳурии Тоҷикистон

Ифтитоҳи маркази ташхисӣ - табобатӣ, ҳаммом, ошхона ва майдончаи варзишии универсалӣ дар деҳоти Исмат Шарифи ноҳияи Данғара

29.05.2020 07:00, ноҳияи Данғара

29 май Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Хуррамзамини деҳоти Исмат Шарифи ноҳияи Данғара Маркази ташхисӣ - табобатӣ, ҳаммом, ошхона ва майдончаи варзишии универсалиро ба истифода доданд.

Нахуст Сарвари давлат аз шароити муҳайёгардида дар Маркази ташхисӣ - табобатӣ шинос шуданд.

Иттилоъ дода шуд, ки иншооти соҳаи тандурустӣ дар доираи эълони “Солҳои рушди деҳот, сайёҳӣ ва ҳунарҳои мардумӣ” аз тарафи соҳибкорони ватандӯст - оилаи Сиддиқовҳо бунёд гардидааст.

Тибқи нақша дар ошёнаи якуми бино дорухона, ҳуҷраи ултрасадо ва ҳуҷраи духтури дандон ба нақша гирифта шуда, озмоишгоҳ, ҳуҷраҳои занона ва тавонбахшӣ дар ошёнаи дуюми бино ҷойгир аст.

Дар озмоишгоҳ бо ворид гардидани таҷҳизоти муосири тиббӣ, аз қабили уроанализатор, центрифуга, биоанализатор, гемоанализатор, термостат ва ғайра имкони баровардани ҳамагуна таҳлилҳо мавҷуд мебошад.

Мутобиқи маълумот дар ин марказ гепатитҳо, вируси норасоии масунияти одам, бемории қанд ва ғайра ташхис карда мешаванд.

Тибқи иттилоъ дар ин ҷо табибони ботаҷрибаи маҳаллӣ ба кор ҷалб гардидаанд.

Солҳои қаблӣ дар ҷамоати Исмат Шарифи ноҳияи Данғара чунин шароит муҳайё набуд ва сокинон барои ташхиси бемориҳои гуногун ба маркази ноҳия ё пойтахт мерафтанд. Акнун маркази ташхисӣ - табобатии навбунёд мушкилии аҳолиро дар ин самт бартараф кард.

 Шумораи умумии ҳуҷраҳои иншооти соҳаи тандурустӣ 10 ададро ташкил дода, ҳамаи онҳо бо компютер ва дигар лавозимоти зарурии тиббӣ муҷаҳҳаз мебошанд.

Дар ҳамин ҷо Сарвари давлат муҳтарам Эмомалӣ Раҳмон майдончаи варзишии универсалиро, ки дар масоҳати 800 метри мураббаъ сохта шудааст ба истифода доданд. Дар иншооти варзишӣ барои бозиҳои футболи хурд ва баскетбол шароити хуб муҳайё карда шудааст.

 Атрофи майдонча чароғон карда шуда, имкони шабона машғул гардидан ба намудҳои гуногуни варзиш низ мавҷуд аст.

Иншоот имкон медиҳад, ки ҷавонон ва дигар сокинони деҳаи Хуррамзамин бештар ба варзиш машғул шаванд ва бо истифода аз чунин имконияти барояшон фароҳамгардида, саҳми худро дар рушди варзиш гузоранд.

То ин ҷониб дар деҳаи Хуррамзамини ҷамоати Исмат Шарифи ноҳияи Данғара чунин майдончаи варзишии дорои тамоми шароити замонавӣ мавҷуд набуд ва иншооти мазкур бо дастгирӣ аз сиёсати варзишпарваронаи Президенти Ҷумҳурии Тоҷикистон муҳтарам Эмомалӣ Раҳмон бо мақсади ҷалби ҷавонону наврасон ба тарзи ҳаёти солим ва рушди инфрасохтори варзиш дар деҳот аз тарафи соҳибкорони бо нангу номуси Ватан дар муҳлати муайяншуда сохта шуд.

Пешвои миллат ба масъулин дастур доданд, ки дар оянда низ чунин тадбирҳоро бештар анҷом дода, шароити муосири ба варзиш машғул шудани ҷавонони маҳаллиро таъмин намоянд.

Бо дастгирӣ аз сиёсати иҷтимоии роҳбарияти олии давлат ва Ҳукумати кишвар дар ин маҷмаа ҳамчунин ҳаммоми замонавӣ бунёд гардидааст, ки он дар ин рӯз аз тарафи Пешвои миллат ифтитоҳ гардид.

Ҳаммоми тозабунёд имкони дар як вақт ба 15 нафар хизмат расониданро дорад. Бартарияти ҳаммом дар он аст, ки аз хизматрасониҳои он мардону занон метавонанд васеъ истифода намоянд.

Баҳри дар сатҳи зарурӣ хизмат расонидан ба мизоҷон, дар ҳаммоми тозабунёд ҳама шароити лозима муҳайё гардидааст.

Корҳои сохтмонӣ соли 2019 оғоз гардида буд ва он бо ҷалби 60 нафар сохтмончиёни маҳаллӣ дар фурсати муайян бо сатҳу сифати баланд ба итмом расид.

Баъди ифтитоҳи иншооти мазкур 25 нафар сокини ҷамоати Исмат Шариф бо ҷойи кор ва маоши хуб таъмин гаштанд.

Аснои шиносоӣ бо имкониятҳои Маркази ташхисӣ - табобатӣ, ҳаммом, ошхона барои 30 нафар ва майдончаи варзишии универсалӣ Пешвои муаззами миллат муҳтарам Эмомалӣ Раҳмон ба соҳибкорони ватандӯст барои дар деҳот муҳайё намудани чунин шароити мусоид изҳори сипосу миннатдорӣ намуда, иқдоми созандаи онҳоро намунаи ибрат хонданд.

Дар ҳамин ҷо ба Сарвари давлат муҳтарам Эмомалӣ Раҳмон аз ҷониби соҳибкорон лоиҳаи Боғи Парчам, биноҳои маъмурӣ, фарҳангӣ ва истеҳсолии хурд дар деҳаи Хуррамзамини ноҳияи Данғара, ки то ҷашни 30-солагии Истиқлолияти давлатӣ ба нақша гирифта шудааст, муаррифӣ карда шуд.  

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520