Президенти Ҷумҳурии Тоҷикистон

Ифтитоҳи Корхонаи коркарди асал дар деҳаи Шайдони деҳоти Сари Хосори ноҳияи Балҷувон

02.10.2021 18:30, ноҳияи Балҷувон
Ифтитоҳи Корхонаи коркарди асал дар деҳаи Шайдони деҳоти Сари Хосори ноҳияи Балҷувон  02.10.2021

Дар рӯзи дуюми сафар ба шаҳру ноҳияҳои вилояти Хатлон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба деҳоти Сари Хосори ноҳияи Балҷувон, ки бо табиати дилфиребу афсункор, сокинони меҳмондӯст ва таърихи бостонии худ машҳури ҷаҳон аст, ташриф оварданд.

Роҳбарияти ноҳия ва сокинони шукргузор Пешвои муаззами миллатро бо самимияти хоса истиқбол гирифтанд.

Дар идомаи боздиди корӣ Президенти Ҷумҳурии Тоҷикистон муҳтарам Эмомалӣ Раҳмон дар деҳаи Шайдони деҳоти Сари Хосор корхонаи “Асали Сари Хосор”-ро мавриди баҳрабардорӣ қарор доданд.

 Корхонаи мазкур дар асоси ҳидоятҳои бевоситаи Президенти Ҷумҳурии Тоҷикистон муҳтарам Эмомалӣ Раҳмон ба истиқболи таҷлили шоистаи 30-солагии Истиқлолияти давлатии Ҷумҳурии Тоҷикистон аз ҷониби соҳибкор Иброҳимзода Маҳадӯсти Азим сохта ба истифода дода шуд.

Корхонаи коркарди асал дар як сол иқтидори коркарди 200 тонна асалро дошта, бо таҷҳизоти насли нав ва технологияи муосир ҷиҳозонида шудааст.

Сарвари давлат зимни шиносоӣ бо зарфиятҳои коргоҳи нав, иқдоми соҳибкорро шоёни дастгирӣ хонда, бо назардошти иқтидорҳои мавҷуда ҷиҳати тавсеаи фаъолияти корхона супоришҳои мушаххас доданд.

Зикр гардид, ки соҳаи занбӯрпарварӣ дар Ҷумҳурии Тоҷикистон яке аз бахшҳои камхарҷ ва сердаромад ба ҳисоб меравад, зеро 93 фоизи масоҳати ҷумҳуриро кӯҳҳо ташкил дода, захираҳои мавҷудаи растаниҳои шаҳддиҳанда имконият медиҳад, ки шумораи оилаҳои занбӯр ва истеҳсоли асал зиёд карда шавад.

Самти асосии фаъолияти корхонаи нав коркард ва банду басти асал буда, арзиши умумии иншоот зиёда аз 5 миллион сомониро ташкил медиҳад.

Истеҳсолоти корхонаи “Асали Сари Хосор” таъиноти содиротӣ дошта, маҳсулот дар зарфҳои ғунҷоишашон мухталифи шаффоф, ки аз Туркия ворид мегардад, басту банд карда мешавад.

Дар дохили корхона намоиши дастовардҳои занбӯриасалпарварони 22 шаҳру ноҳияи вилояти Хатлон ба роҳ монда шуд.

Маълум гардид, ки бо истифода аз дастгириҳои роҳбарияти Ҳукумати мамлакат ва дар чаҳорчӯбаи татбиқи амалии Барномаи давлатии рушди соҳаи занбӯриасалпарварӣ дар Ҷумҳурии Тоҷикистон, ин бахши сердаромади соҳаи аграрии кишвар дар миқёси вилоят рӯ ба рушд ниҳода, афзоиши тадриҷии оилаҳои занбӯри асал ва истеҳсоли маҳсулоти соҳа ба қайд гирифта мешавад.

Ноҳияи Балҷувон минтақаи кӯҳсор буда, дар ҳудуди ноҳия тамоми растаниҳое, ки дар қаламрави Ҷумҳурии Тоҷикистон мерӯянд, мавҷуд аст.

Айни замон дар ноҳия зиёда аз 4 ҳазор оилаи занбӯри асал парвариш меёбад, ки ин нишондиҳанда нисбат ба соли ‎2015 750 оила зиёд мебошад. Асали дар ноҳия истеҳсолшаванда дар баробари таъмини аҳолии ноҳияи Балҷувон бо маҳсулоти худӣ, ҳамзамон барои ба фурӯш баровардан ба дигар минтақаҳои ҷумҳурӣ ва содироти он ба хориҷа пешниҳод мегардад.

Соли 2020 занбӯриасалпарварони ноҳияи Балҷувон 46,5 тонна асал истеҳсол намудаанд. Айни замон дар корхонаи нав банду басти қуттиҳои асал дар шаклҳои гуногун ба роҳ монда шудааст ва масъулини корхона талош доранд, ки бо пешниҳоди тарзу усулҳои муосири банду баст ва рақобатпазир намудани маҳсулоти истеҳсолӣ, ба бозорҳои ҷаҳонӣ бештар роҳ пайдо кунанд. Дар ин корхона 20 нафар бо ҷойи кори доимӣ таъмин гардиданд.

Сарвари давлат муҳтарам Эмомалӣ Раҳмон аснои шиносоӣ бо фаъолияти корхонаи “Асали Сари Хосор”, масъулонро вазифадор карданд, ки дар масъалаи банду басти асал ва содироти он беш аз пештара таваҷҷуҳ зоҳир кунанд. Зеро дар баробари сифати баланди асал, инчунин бояд банду баст ва ороишоти зоҳирии он низ бозоргузар бошад. Ҳамаи ин ба рақобатпазирӣ дар бозори ҷаҳонӣ мусоидат карда, иқтидори содиротии кишварро тақвият мебахшад.

Дар саҳни корхонаи нави коркарди асал, инчунин намоиши маҳсулоти кишоварзиву саноатии корхонаҳои вилоят ташкил карда шуд.

Дар намоишгоҳ намудҳои зиёди гиёҳҳои шифобахши кӯҳистони Сари Хосор, дастовардҳои барзгарони минтақа, ҳунарҳои мардумӣ ва тавлидоти саноатӣ ба маърази тамошо гузошта шуд.

Зимни боздид Пешвои миллат муҳтарам Эмомалӣ Раҳмон ба фаъолияти кишоварзону саноатчиён баҳои баланд дода, ҷиҳати азхудкуниии бештари зарфиятҳои табиии минтақа ба онҳо дастуру ҳидоятҳо доданд.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520