Президенти Ҷумҳурии Тоҷикистон Эмомалӣ Раҳмон дар ҷамъомади тантанавии бахшида ба 10 - солагии таъсисёбии Агентии назорати маводи нашъаовар иштирок ва суханронӣ намуд.
Сарвари давлат Эмомалӣ Раҳмон аз саҳми арзандаи Агентии назорати маводи нашъаовар дар пешгирӣ ва мубориза бар зидди хатари ҷиддии глобалӣ - муомилоти ғайриқонунии маводи мухаддир ёдовар шуда, ҳамаи кормандони агентиро ба ин муносибат табрику таҳният гуфт.
Президенти Ҷумҳурии Тоҷикистон Эмомалӣ Раҳмон баҳри пурзӯр намудани муборизаи байналмилалӣ бар зидди ин хатари глобалӣ як қатор пешниҳодҳои муфид ба миён гузошт.
Аз ҷумла пешниҳод карда шуд, ки то соли 2010 таҳти сарпарастии Созмони Милали Муттаҳид Барномаи ягонаи мубориза бар зидди муомилоти маводи мухаддир та?ия карда шуда, бо иштироки давлатҳои манфиатдор ва созмонҳои байналмилалӣ Конфронси байналмилалӣ баргузор гардад ва соли 2011-ум Соли байналмилалии мубориза бар зидди муомилоти ғайриқонунии маводи мухаддир эълон карда шавад.
«Тоҷикистон аз ҷониби худ омода аст, ки илова ба андешидани чораҳои қатъии мубориза бар зидди маводи мухаддир ширкаткунандагони конфронси пешниҳодшударо дар пойтахти худ – шаҳри Душанбе пазироӣ намояд», изҳор дошт Сарвари давлат Эмомалӣ Раҳмон.