Президенти Ҷумҳурии Тоҷикистон Эмомалӣ Раҳмон Иҷрокунандаи вазифаи Фармондеҳи Нерӯҳои Марказии Иёлоти Муттаҳидаи Амрико Мартин Демпсиро ба ҳузур пазируфт.
Дар вохӯрӣ оид ба масоили ҳамкориҳои ҳарбӣ сиёсии Тоҷикистону Амрико, авзои имрӯза ва дурнамои Афғонистон, муборизаи муштарак бо хатарҳои ҷаҳони муосир, пеш аз ҳама терроризму экстремизм ва гардиши ғайриқонунии маводи мухаддир гуфтугӯ сурат гирифт.
Мартин Демпси ба нақши Тоҷикистон дар мусоидати фаъол ба нерӯҳои эътилофии таъмини амният дар Афғонистон баҳои баланд дода, ба Сарвари давлат Эмомалӣ Раҳмон арзи сипосу миннатдорӣ кард.
Аз сатҳи ҳамкории байни сохторҳои низомии ду кишвар дар мубодилаи таҷрибаю иттилоот, омӯзиши кадрҳо ва кӯмак ба Қӯшунҳои сарҳадии Тоҷикистон изҳори қаноатмандӣ карда шуд.
Гуфтугӯйи судманд ҳамчунин атрофи рушди ҳамкориҳои минтақавӣ дар Осиёи Марказӣ ва расондани кӯмак дар барқарорсозии иқтисодиёти Афғонистон сурат гирифт.