Президенти Ҷумҳурии Тоҷикистон Эмомалӣ Раҳмон ҳамчунин Сафири фавқулодда ва мухтори Ҷумҳурии Федеролии Олмон дар Тоҷикистон Райнер Мюллерро бинобар анҷом ёфтани мӯҳлати ваколати дипломатиаш дар кишвари мо ба ҳузур пазируфт.

Дар мулоқот масоили ҳамкории имрӯза ва ояндаи Тоҷикистону Олмон баррасӣ шуд.

Сарвари давлат Эмомалӣ Раҳмон ба Райнер Мюллер барои фаъолияти босамари дипломатиаш дар Тоҷикистон ва ба Ҳукумати Ҷумҳурии Федеролии Олмон барои кӯмакҳои беғаразона ва дастгирии пайваста, аз ҷумла баҳри маблағгузории лоиҳаи азнавсозии зеристгоҳи 220 киловолтаи барқтақсимкунӣ дар шаҳри Норак арзи сипос намуд.

Райнер Мюллер изҳор дошт, ки Ҷумҳурии Федеролии Олмон чун шарики боэътимоди Тоҷикистон дар Аврупои Ғарбӣ минбаъд низ барои густариши муносибатҳои судбахши ду кишвар ҷаҳду талош мекунад ва худи ӯ низ саҳми арзандаашро дар ин кор дареғ нахоҳад дошт.

Аз сатҳ ва натиҷаи санҷиши (экспертизаи) байналмилалии лоиҳаи сохтмони нерӯгоҳи обии барқӣ дар болои дарёи Зарафшон, ки аз ҷониби коршиносони олмонӣ гузаронда шудааст, изҳори қаноатмандӣ карда шуд, зеро ки тибқи хулосаи онҳо сохтмон ва фаъолияти нерӯгоҳҳои обӣ дар болои ин рӯд ҳеҷ таъсири манфӣ ба Ҷумҳурии Узбекистон намерасонад.

Дар мулоқот ҳамчунин атрофи ҷалби сармояи доираҳои соҳибкории Олмон ба иқтисодиёти Тоҷикистон ва дигар масоили мавриди таваҷҷӯҳ гуфтугӯ сурат гирифт.