Президенти Ҷумҳурии Тоҷикистон Эмомалӣ Раҳмон Намояндаи махсуси Котиби Генералии Созмони Милали Муттаҳид (СММ), Роҳбари Маркази минтақавии СММ оид ба дипломатияи пешгирикунанда дар Осиёи Марказӣ Мирослав Енчаро ба ҳузур пазируфт.
Роҳбари марказ, ки дар таърихи Созмони Милали Муттаҳид нахустин муассисаи минтақавии он оид ба дипломатияи пешгирикунанда аст, ба Сарвари давлати Тоҷикистон Эмомалӣ Раҳмон доир ба ҳадафу вазифаҳои ин сохтори навтаъсис ахборот дода, изҳори умед намуд, ки марказ бо мусоидат ва дастгирии роҳбарияти давлатҳои Осиёи Марказӣ метавонад ба бартараф намудани мушкилоти ҳамкории минтақавӣ дастёб шавад.
Сарвари давлат Эмомалӣ Раҳмон устуворию пайвастагии мавқеъи Тоҷикистонро дар таҳкиму густариши ҳамгироии минтақавӣ таъкид намуда, изҳор дошт, ки кишвари мо баҳри ҳаллу фасли мушкилоти мавҷуда ҳадафмандона кӯшиш мекунад.
Ҳаллу фасли масоили истифодабарии босамари захираҳои обӣ, тавсиаи ҳамкории иқтисодӣ ва таҳкими амнияту суботи кишварҳои минтақа аз ҷумлаи мавзӯъҳои асосии сӯҳбат буд.
Таъкид гардид, ки Ҷумҳурии Тоҷикистон ва Маркази минтақавии СММ оид ба дипломатияи пешгирикунанда дар Осиёи Марказӣ баҳри татбиқи ҳадафҳои судманди ба манфиати кулли мардумони минтақа равонагашта ҳамкории мустаҳкам ба роҳ мемонанд.