Субҳи имрӯз Президенти Ҷумҳурии Тоҷикистон Эмомалӣ Раҳмон Роҳбари Маъмурияти Президенти Федератсияи Россия Сергей Нарышкинро ба ҳузур пазируфт.
Дар мулоқот масоили ҷорӣ ва дурнамои муносибатҳои гуногунҷанбаи Тоҷикистону Россия баррасӣ шуд.
Сарвари давлат Эмомалӣ Раҳмон сохтмони нерӯгоҳи обии Сангтӯда-1-ро самараи хуби ҳамшарикии стратегии Тоҷикистону Россия маънидод карда, изҳори боварӣ намуд, ки чунин ҳамгироии мутақобилан судманд минбаъд низ бемайлон идома хоҳад ёфт.
Ҷонибҳо оид ба тафсилоти ҳамкориҳои ду кишвар дар татбиқи дигар лоиҳаҳои гидроэнергетикӣ ва истихроҷу коркарди нафту гази Тоҷикистон гуфтугӯйи судманд анҷом доданд.
Таъкид гардид, ки баъди анҷоми сохтмони нерӯгоҳи обии Сангтӯда-1 техникаю таҷҳизот ва кормандону мутахассисони он метавонанд ба бунёди нерӯгоҳи Роғун сафар карда шаванд.
Изҳори боварӣ карда шуд, ки сафари расмии Президенти Федератсияи Россия Дмитрий Медведев ба Тоҷикистон ба раванди ҳамкориҳои ду кишвар дар ҳамаи соҳаҳо такони ҷиддӣ мебахшад.