Имрӯз Президенти Ҷумҳурии Тоҷикистон Эмомалӣ Раҳмон Раиси Бонки тавсиаи содироти Ҷумҳурии Исломии Эрон Куруши Парвизиёнро ба ҳузур пазируфт.
Дар мулоқот масоили маблағгузории лоиҳаҳои муштараки ду кишвар, ки дар Тоҷикистон татбиқ мегарданд, баррасӣ шуд.
Мубодилаи судманди афкор оид ба сармоягузории саривақтии бунёди нерӯгоҳи обии Сангтӯда-2, нақби мошингарди Чормағзак ва бисёр лоиҳаҳои дигар, ки дар соҳаҳои кишоварзӣ, нассоҷӣ, сохтмон ва тиҷорат амалӣ мешаванд, сурат гирифт.
Ба гуфти Куруши Парвизиён Ҷумҳурии Исломии Эрон тасмим дорад, ки баҳри дасгирии кишоварзони Тоҷикистон, аз ҷумла барои харидорӣ намудани техникаю таҷҳизот бо яке аз бонкҳои марбути ин соҳа дар ин ҷо муассисаи муштараке таъсис диҳад.
Дар мулоқот ҳамчунин доир ба дигар масоили мавриди таваҷҷӯҳ гуфтугӯи судманд сурат гирифт.