Президенти Ҷумҳурии Тоҷикистон

Ифтитоҳи корхонаи равғанбарории ҶДММ “Файзи баракат” дар ноҳияи Синои шаҳри Душанбе

31.10.2023 12:17, шаҳри Душанбе
Ифтитоҳи корхонаи равғанбарории ҶДММ “Файзи баракат” дар ноҳияи Синои шаҳри Душанбе  31.10.2023

31 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Синои пойтахт Корхонаи равғанбарории Ҷамъияти дорои масъулияти маҳдуди “Файзи баракат”-ро ифтитоҳ карданд.

Корхонаи равғанбарории Ҷамъияти дорои масъулияти маҳдуди “Файзи баракат” аз ҷониби соҳибкори ватанӣ Файзалӣ Ҳоҷиев бо мақсади дастгирии сиёсати созандаи Пешвои миллат ва дар доираи амалисозии ҳадафи стратегии саноатикунонии босуръати кишвар дар масоҳати 1 гектар бунёд шудааст.

Корҳои сохтмонӣ дар доираи тадбирҳои ободонию бунёдкорӣ истиқболи ҷашни 35-солагии Истиқлоли давлатии Тоҷикистон моҳи декабри соли 2022 оғоз гардида, имрӯз дар вазъияти тантанавӣ мавриди истифода қарор гирифт.

Корхонаи мазкур аз ҳисоби даромади софи Ҷамъияти дорои масъулияти маҳдуди “Файзи Сомон” бунёд гардида, иқтидори солонаи он истеҳсоли 25 ҳазор тонна равғанро ташкил медиҳад.

Дар корхона дар як шабонарӯз 70 тонна ва дар як моҳ 2100 тонна навъҳои гуногуни равғани босифат истеҳсол мегардад.

Дар ин ҷо 50 нафар сокини маҳаллӣ бо ҷойи кори доимӣ таъмин гардида, оянда бо афзун намудани ҳаҷми иқтидори истеҳсолӣ шумораи коргарон ба 100 нафар расонда мешавад.

Корхона бо мақсади таъмини талаботи сокинон бо маҳсулоти истеҳсоли худӣ ва дорои сифати баланд таъсис ёфтааст. Дар корхонаи истеҳсолӣ аз пахта, маъсар, лӯбиё ва офтобпараст равған истеҳсол ва дар зарфҳои гуногуни пластикӣ ҷой карда мешавад. Коргарони корхона маҳсулоти худро ба сокинон бо нархи дастрас ва нисбат ба бозор арзон пешкаш мекунанд.

Самти фаъолияти корхонаи “Файзи баракат” ба истеҳсоли равғанҳои растанӣ ва зарфҳои пластикӣ нигаронида шудааст. Маҳсулоти корхона ивазкунандаи воридот буда, оянда ба содирот равона карда мешавад.

Барои истеҳсоли равғани растанӣ аз Чин, Ҷопон, Полша ва дигар давлатҳо технологияи муосир оварда, васлу насб карда шудааст.

Дар Ҷамъияти дорои масъулияти маҳдуди “Файзи баракат” раванди истеҳсолот асосан аз чанд марҳила, ба монанди ҷабиши сард, софкунӣ, безараргардонӣ, ширинкунӣ ва банду басти зарфҳои гуногунҳаҷми аз 1 то 20 литраро дар бар мегирад. Маҳсулоти тавлидшуда аз лиҳози сифат ба стандартҳои ҷаҳонӣ ҷавобгӯ мебошад.

Ҷиҳати беҳтар намудани сифат ва мониторинги ҳаррӯзаи он дар дохили корхона озмоишгоҳи замонавӣ низ фаъолият дорад, ки мутахассисони варзидаи соҳа бо истифода аз дастгоҳу таҷҳизоти муосир мутобиқат ва бехатарии маҳсулотро назорат мекунанд.

Аснои шиносоӣ бо раванди истеҳсолот Пешвои миллат муҳтарам Эмомалӣ Раҳмон ба масъулони корхона барои афзун намудани ҳаҷми маҳсулот, таъсиси ҷойҳои нави корӣ ва таъмини бозори дохилӣ бо равғани растанӣ, ки бештар аз хориҷи кишвар ворид карда мешавад, маслиҳатҳои муфид доданд.

Дар арафаи ифтитоҳи корхона директори Ҷамъияти дорои масъулияти маҳдуди “Файзи баракат” Давлаталӣ Ҷӯрабеков ва роҳбари Ширкати чинии “Синзян Мадина Интернешнл Логистик груп Ко лимитед” Кунугули Махачи барои содироти равғани корхона ба Ҷумҳурии Мардумии Чин ба маблағи 5 миллион доллари амрикоӣ созишномаи ҳамкорӣ ба имзо расонданд.

 

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520