Нимаи дуюми рӯз ҷиҳати тамошо аз мусобиқаи пойгаҳ ва ё аспдавонӣ ва човандозӣ ё бузкашӣ Президенти Ҷумҳурии Тоҷикистон Эмомалӣ Раҳмон ва ҳайати ҳамроҳи ӯ ба ипподроми шаҳри Хуҷанд ташриф оварданд.
Иппадроми шаҳри Хуҷанд солҳои охир ва хусусан дар арафаи Наврӯзи имсола ба истиқболи тантанаҳои ҷумҳуриявии идона хеле ободу зебо гаштааст.
Дар мусобиқаҳои пойгаҳ ва бузкашӣ беҳтарин аспҳои навъҳои инглисӣ қаробоир, ахалтегин ва шумораи зиёди аспҳои навъи тоҷикӣ бо аспсаворону таковарони маъруф аз тамоми паҳнои вилояти Суғд ва дигар манотиқи ҷумҳурӣ иштирок намуданд.
Дар даври ниҳоии пойгаҳ аспи зоти инглисӣ бо номи Викинг аз хоҷагии асппарварии Руҳаки шаҳри Хуҷанд пеш аз ҳама ба марра расид ва соҳиби он аз ҷониби Президенти Ҷумҳурии Тоҷикистон Эмомалӣ Раҳмон бо шоҳҷоизаи мусобиқа- мошини сабукрав сарфароз гардонида шуд.
Баъди анҷоми ин чорабинии бошукӯҳи идона Сарвари давлат Эмомалӣ Раҳмон ба масъулини дахлдор ҷиҳати боз ҳам обод намудани иппадром, муҳайё сохтани шароити мусоиди парвариши аспҳои хушзот, пеш аз ҳама аспҳои навъи тоҷикӣ, тарбия кардани аспсаворони сатҳи байналмилалӣ ва бад ин васила саҳм гузоштан дар тарғибу ташвиқи фарҳанги бостонии миллати худ як қатор ҳидоятҳои муфид дод.
Баргузории тантанаҳои ҷумҳуриявии наврӯзӣ дар Хуҷанди бостонӣ, ки имрӯз дар оғуши зардолуҳои сершумори гулкарда ба як шаҳри дилрабои гулпӯш табдил ёфтааст, дар хотири тамоми иштирокчиёни он чун иди баҳору шукуфоӣ, оғози соли нави бобоӣ ва эҳёи анъанаҳои шуҳратманди миллати бостонии тоҷик нақши ногусастанӣ мебандад.