Президенти Ҷумҳурии Тоҷикистон Эмомалӣ Раҳмон Фармондеҳи Артиши марказии Иёлоти Муттаҳидаи Амрико Ҷеймс Меттисро ба ҳузур пазируфт.
Дар мулоқот масоили ҳамкории Тоҷикистону Амрико баррасӣ шуд.
«Мо ба муносиботи худ бо Иёлоти Муттаҳидаи Амрико таваҷҷўҳи хоса зоҳир менамоем ва ҷонибдори рушду густариши ҳарчи бештари робитаҳо дар арсаҳои гуногун ҳастем».
Аз ҳамкории Тоҷикистону Амрико дар таҳкими амнияту суботи минтақавӣ изҳори қаноатмандӣ карда шуд.
Генерал ҷеймс Меттис ба Сарвари давлати Тоҷикистон Эмомалӣ Раҳмон барои мусоидати фаъоли кишвари мо ба нерўҳои посдори сулҳ дар Афғонистон ва ба барќарорсозиии иќтисодиёт ва ҳаёти осоишта дар ин давлат арзи сипос намуд.
Таъкид гардид, ки татбиќи амалии лоиҳаҳои минтақавӣ доир ба бунёди роҳҳои оҳану мошингард ва хатҳои интиќоли нерўи барқ ва пайвастани онҳо бо шабакаҳои нақлиётию барқии кишварҳои ҳамсоя, аз ҷумла Тоҷикистон ба манфиати таҳкими амнияту субот дар минтақа хоҳад буд.
Таваҷҷўҳи зиёд ҳамчунин ба пурзўр намудани мубориза бо терроризму экстремизм, гардиши ғайриќонунии маводи мухаддир ва таҳкими ҳифзи сарҳади миёни Тоҷикистону Афғонистон зоҳир карда шуд.