Дар сомонаи расмии Президенти Ҷумҳурии Тоҷикистон дар шабакаи ҷаҳонии интернет боз як навоварии муҳим ворид гардид. Кунун маводи заруриро аз ин сомона метавон тавассути харитаи интерактивии Тоҷикистон пайдо намуд.

Харитаи интерактивии Тоҷикистон дар сомонаи расмии Президенти кишвар дар шабакаи ҷаҳонии интернет барои осону қулай ва зуд пайдо намудани хабару гузоришҳо, аксу навор, китобҳо ва дигар маводи зарурӣ таҳия ва пешкаш гардидааст.

Харита дар барномаи HTML5 сохта шуда, ба ҳама намуд ва шакли браузерҳои хонандагони сомона дар бахшҳои тоҷикӣ, русӣ ва англисии он дастрас мебошад.

Дар харитаи интерактивии Тоҷикистон ҳамаи 65 шаҳру ноҳияи кишвар нишон дода шудааст. Ҳангоми пахш намудани ягон шаҳр ва ё ноҳия, хабару гузоришҳо аз сафарҳо ва суханрониҳои Президенти Тоҷикистон дар ҳамон макон бо аксу наворҳояш пешкаш мегардад.