Имрӯз боздиди расмии Президенти Ҷумҳурии Тоҷикистон Эмомалӣ Раҳмон аз Ҷумҳурии Қирғизистон бо мулоқотҳо бо Раиси Парлумон ва Сарвазири Ҷумҳурии Қирғизистон идома ёфт.
Субҳи имрӯз Сарвари давлати Тоҷикистон Эмомалӣ Раҳмон нахуст ба майдони Ғалабаи шаҳри Бишкек ташриф оварда, ба нишони эҳтиром ба арзишҳои миллию таърихии Ҷумҳурии Қирғизистон дар назди гулхании ёдгорӣ аз қаҳрамонону қурбониёни мардуми ин кишвар гулчанбар гузошт ва хотираи онҳоро пос дошт
Дар мулоқот бо Раиси Жогорку Кенеши (Парлумони) Ҷумҳурии Қирғизистон Асил Жеенбеков масоили таҳкими асосҳои сиёсию ҳуқуқии муносиботи ду кишвар ва робитаҳои байнипарлумонӣ баррасӣ шуд.
Ба натиҷаҳои гуфтушуниди сатҳи олӣ, ки дирӯз ҷараён дошт ва азми устувори роҳбарияти ду кишвар ба таҳким ва густариши дӯстӣ ва ҳамкории судбахш баҳои баланд дода шуд.
Сарвари давлати Тоҷикистон Эмомалӣ Раҳмон барои густариши бештари робитаҳо пешниҳод намуд, ки гурӯҳи дӯстии миёни парлумонҳои Тоҷикистону Қирғизистон аз ҳисоби намояндагони мардумии ду кишвар таъсис дода шавад.
Дар мулоқот бо Сарвазири Қирғизистон Жанторо Сотиболдиев бошад паҳлӯҳои гуногуни ҳамкории иқтисодию тиҷоратии ду кишвар дар партави санадҳои нави имзошуда ва тавофуқоти ҳосилгардида баррасӣ шуд.