Мулоқоти расмии Президенти Ҷумҳурии Тоҷикистон Эмомалӣ Раҳмонов ва Президенти Ҷумҳурии Исломии Эрон Маҳмуди Аҳмадинажод баргузор гашт.
Маҷмӯи васеи масоили ҳамкориҳои дуҷонибаи ду кишвари дорои муштаракоти зиёди фарҳангию таърихӣ нахуст дар мулоқоти хоссаи сарони давлатҳо сипас дар мулоқоти васеъ бо иштироки ҳайатҳои расмии ҳарду ҷониб баррасӣ шуд.

"Мо аз оғози истиқлоли Ватан дӯстӣ ва ҳамкории васеъ бо Ҷумҳурии Исломии Эронро самти муҳимми стратегияи минтақавӣ ва байналмилалии Тоҷикистони соҳибистиқлол эълом доштем ва барои таъмини он доиман талош намудем ва имрӯз метавон бо қаноатмандӣ зикр намуд, ки равобит ва ҳамкории дӯстонаи ду кишвар ва ду халқ сатҳ ва мазмуни баланд ва матлуби таърихӣ касб менамоянд ва ба иродаи мардумон ва панди ниёгон бештару бештар созгор мешаванд", изҳор дошт зимни мулоқот Президенти Ҷумҳурии Тоҷикистон Эмомалӣ Раҳмонов.

Сарвари давлати Тоҷикистон Эмомалӣ Раҳмонов ҳамчунин изҳори боварӣ намуд, ки ташрифи расмии Президенти Ҷумҳурии Исломии Эрон ба Ҷумҳурии Тоҷикистон ба рушди равобити мутақобилан судбахши ду кишвар такони ҷиддӣ хоҳад бахшид.

Ҷонибҳо аз сатҳ ва мазмуни ҳамкориҳои ду кишвари дӯст изҳори қаноатмандӣ намуда, иштироки сармоя ва мутахассисони Ҷумҳурии Исломии Эронро дар бунёди нақби мошингарди Анзоб, нерӯгоҳи обии барқии Сангтӯда-2 ва чанд иншооти дигар намунаи хуби ҳамкориҳои иқтисодӣ арзёбӣ намуданд.
Татбиқи амалии лоиҳаҳои стратегии соҳаи гидроэнергетика ва роҳсозии Тоҷикистон дорои аҳамияти бузург барои кулли кишварҳои минтақа маънидод карда шуд.

Дар мулоқот ҳамчунин атрофи ҳамкориҳо дар соҳаи иқтисод ва савдо, таҳкими равобити байнипарлумонӣ, ҳамкории иттилоотӣ, марзбонӣ, низомӣ, саҳмгузории муштарак дар бозсозии баъдиҷангии Ҷумҳурии Исломии Афғонистон ва дигар мавзӯъҳои мавриди таваҷҷӯҳи тарафҳо мубодилаи афкор сурат гирифт.

Раиси Ҷумҳурии Исломии Эрон Маҳмуди Аҳмадинажод ба муносибатҳои ҳамкории иқтисодӣ, дипломатӣ ва фарҳангии Тоҷикистону Эрон баҳои баланд дода, изҳори боварӣ намуд, ки суръати густариш ва таҳкими равобити ду кишвар минбаъд низ боло хоҳад рафт, зеро ки мо мехоҳем Тоҷикистони ҳамзабону ҳамфарҳанги худро ба ҳайси як давлати қавию сарватманд ва пешрафта бубинем, - таъкид намуд ӯ.

Зимни мулоқоти пурмӯҳтаво, ки дар фазои созанда ва ҳусни тафоҳум оид ба тамоми масоили мавриди таваҷҷӯҳи ҷонибҳо ҷараён гирифт, тарафҳо омодагии худро баҳри таҳкиму тавсеаи минбаъдаи робитаҳои мутақобилан судманди ду кишвари дӯст таъкид намуданд.

Раиси Ҷумҳурии Исломии Эрон Маҳмуди Аҳмадинажод барои рушди ҳамкориҳои гуногунҷабҳаи дуҷониба пешниҳод намуд, ки як телевизиони муштараки фарҳангии форсизабонон, як муассисаи муштараки таълимии фарҳангӣ бунёд карда шавад. Ӯ ҳамчунин изҳор дошт, ки Ҷумҳурии Исломии Эрон омода аст барои таълим додани мутахассисони ҷавони Тоҷикистон 100 ҷой дар муассисаҳои олии таълимии кишвараш ҷудо намояд.

Маҳмуди Аҳмадинажод ҳамчунин пешниҳодҳои муфид ва дорои аҳамияти бузурги минтақавии Президенти Ҷумҳурии Тоҷикистон Эмомалӣ Раҳмоновро дар бораи истихроҷ ва коркарди газу нафти Тоҷикистон ва рушди ҳамкориҳои нақлиётию энергетикӣ мавриди дастгирӣ қарор дод.