Дар мулоқоти Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Арманистон Серж Саргсян масоили ҳамкории судманди ду кишвар баррасӣ шуд.

Аз заминаи мусоиди қарордодӣ-ҳуқуқии ҳамкории миёни ду кишвар, аз ҷумла Аҳдномаи дўстӣ ва ҳамкорӣ ва ҳамчунин ҳамсонӣ ва ё наздикии мавқеъҳои ду давлат доир ба аксари масоили байналмилалӣ изҳори қаноатмандӣ карда шуд.

Фаъолияти бештари Комиссияи байниҳукуматии ҳамкории дуҷониба ва густариши робитаҳои иқтисодӣ-тиҷоратӣ ва илмию фарҳангӣ зарур шумурда шуд.

Серж Саргсян иттилоъ дод, ки ба истиқболи солгарди 20 – уми истиқлолияти давлатии Тоҷикистон барои Китобхонаи мўҳташами миллии навбунёд дар шаҳри Душанбе шумораи зиёди китобҳои илмию таърихӣ, бадеӣ ва омўзишӣ доир ба соҳаҳои гуногуни ҳаёти ҷомеа бо забонҳои арманӣ, русӣ ва англисӣ тўҳфа овардааст.

Дар мулоқот, ҳамчунин доир ба масоили муҳими минтақавию ҷаҳонӣ гуфтугў сурат гирифт.