Аз ҷониби Президенти мамлакат Эмомалӣ Раҳмон як қатор Қонунҳои Ҷумҳурии Тоҷикистон, ки онҳоро Маҷлиси намояндагон қабул ва Маҷлиси миллӣ ҷонибдорӣ намудаанд, ба имзо расиданд.
Қонунҳои Ҷумҳурии Тоҷикистон "Дар бораи заминсозӣ", "Дар бораи хизматрасонии иҷтимоӣ", "Дар бораи олами ҳайвонот", "Дар бораи тухмипарварӣ", "Дар бораи мақомоти худфаъолияти ҷамъиятӣ", "Дар бораи судҳои ҳакамӣ", Кодекси мурофиавии граждании Ҷумҳурии Тоҷикистон, Кодекси Ҷумҳурии Тоҷикистон дар бораи мурофиаи судии иқтисодӣ аз ҷумлаи онҳо мебошанд.
Қонунҳои ба имзорасида, пеш аз ҳама бо мақсади таъмини рушди минбаъдаи соҳаҳои мухталифи ҳаёти кишвар, танзими ҳаматарафаи муносибатҳои ҷамъиятӣ ва такмили қонунҳои амалкунандаи ҷумҳурӣ қабул карда шудаанд.
Кодекси мурофиавии граждании Ҷумҳурии Тоҷикистон бо назардошти муносибатҳои имрӯзаи ҷомеа таҳия ва қабул гардида, меъёрҳои он ба таъмини ҳуқуқу озодиҳои инсону шаҳрванд, манфиатҳои давлатию ҷамъиятӣ, ташкилоту муассисаҳо ва дигар субъектҳои муносибати ҳуқуқи гражданӣ равона карда шудааст. Кодекси мазкур аз 1 апрели соли 2008 мавриди амал қарор дода мешавад ва ҳамзамон Кодекси проссесуалии граждании Ҷумҳурии Тоҷикистон, ки аз 28 декабри соли 1963 амал менамояд, аз эътибор соқит мегардад.
Қонуни Ҷумҳурии Тоҷикистон "Дар бораи судҳои ҳакамӣ" таъсису фаъолияти судҳои ҳакамӣ ва тартиби баррасии баҳсҳоро аз тарафи он ба танзим медарорад.
Қонуни мазкур дар низоми қонунгузории Ҷумҳурии Тоҷикистон санади меъёрии ҳуқуқии нав буда, меъёрҳои он барои боз ҳам фароҳам овардани шароити васеъ ба субъектҳои муносибати гражданӣ дар ҳимояи ҳуқуқи онҳо ҳангоми пайдо шудани баҳс равона гардидааст.