Президенти Ҷумҳурии Тоҷикистон Эмомалӣ Раҳмон Сафири фавқулодда ва мухтори Ҷумҳурии Исломии Покистон дар Тоҷикистон Икромулло Мақсудро бинобар анҷом ёфтани мӯҳлати ваколати сафириаш ба ҳузур пазируфт.

Дар мулоқот оид ба ҳолати имрӯза ва дурнамои муносибатҳои Тоҷикистону Покистон мубодилаи судманди афкор сурат гирифт.

Ҷонибҳо дурнамои робитаҳои ҳамкории гуногунҷанбаи Тоҷикистону Покистонро, пеш аз ҳама баҳри бунёди хатҳои минтақавии интиқоли нерӯи барқ, таҳкиму густариши муносибатҳои тиҷоратӣ ва нақлиётию коммуникатсионӣ умедбахш маънидод карданд.

Икромулло Мақсуд мавриди истифода қарор гирифтани пули азими миёни Тоҷикистону Афғонистонро дар мавзеи Панҷи Поён воситаи хуби густариши робитаҳои бисёрҷанба номида, изҳор дошт, ки Покистон тасмим дорад дар ин мавзеъ маркази тиҷоратии худро ифтитоҳ намояд.

Дар мулоқот ҳамчунин атрофи авзои кунунии иҷтимоию сиёсии Покистону Афғонистон ва ҳамгироиҳои зиддитеррористӣ табодули назар карда шуд.