Президенти Ҷумҳурии Тоҷикистон Эмомалӣ Раҳмон бо иштироки масъулини Ҳукумати мамлакат, Дастгоҳи иҷроияи Сарвари давлат, роҳбарони як қатор вазорату идораҳои марбута ва дигар шахсони масъул машварати корӣ доир намуд.

Дар машварат масоили вобаста ба натиҷаҳои сафари расмии Президенти Ҷумҳурии Тоҷикистон ба Туркманистон, омодагӣ ба гузарондани Рӯзҳои фарҳанги Тоҷикистон дар Туркманистон, ҳалли мушкилоти бахши пахтакорӣ, кӯмак ба деҳқонон барои шудгори заминҳо, омодагӣ ба кишти баҳорӣ, иҷрои буҷети давлатии соли равон, тайёрӣ ба мулоқоти Президенти Ҷумҳурии Тоҷикистон бо соҳибкорони кишвар ва масъалаи ҷамъбасти фаъолияти хоҷагии халқ дар соли 2007 баррасӣ шуд.

Сарвари давлат Эмомалӣ Раҳмон ба Вазорати фарҳанг ва дигар сохторҳои марбута дастур дод, ки нақшаю барномаи Рӯзҳои фарҳанги Тоҷикистон дар Туркманистонро омода намуда, барои гузарондани он дар нимаи дуюми моҳи сентябри соли оянда тамоми чораҳои заруриро андешанд.

Президенти Ҷумҳурии Тоҷикистон Эмомалӣ Раҳмон ҳамчунин ҷиҳати аз соли нав амалӣ намудани механизми дигари маблағгузории бахши пахтакорӣ, таъмини иҷрои буҷети давлатии соли равон, муҳайё намудани заминаи рушди соҳибкории хусусии хурду миёна, афзоиш додани қарздиҳии хурди бонкӣ ба соҳибкорон, ҷамъбасти натиҷаҳои сол, шудгори заминҳои корам ва омодагӣ ба кишти баҳорӣ ба масъулин дастуру супоришҳои қатъӣ дод.