Дар маркази ноҳияи Ёвон бо иштироки Президенти кишвар Эмомалӣ Раҳмон ҳамчунин як маҷмааи истеҳсолию хизматрасонӣ, ки аз ҷониби соҳибкори маҳаллӣ Илҳом Мирзоев бунёд ёфтааст, ба кор дароварда шуд.

Чунонки аён гардид, ин маҷмаа дар бинои нави чорошёна бо таҳхона ҷойгир шуда, аз корхонаи ҷӯроббофӣ, корхонаи дӯзандагӣ, маркази савдо ва ошхонаи ҷамъиятӣ иборат аст.

Корхонаи ҷӯроббофии маҷмаа дорои иқтидори 9 миллион ҷуфт ҷӯроб дар як сол буда, дар он ҳоло 83 нафар бо кори доимӣ таъмин шудаанд. 80% фоизи таркиби ҷӯробҳои ин корхона аз пахта буда, дар дохил ва хориҷи кишвар харидорони доимӣ доранд. Чунонки иттилоъ доданд, оянда ҷӯроббофӣ дар ин корхона бо таҷҳизоти аз ин навтару замонавӣ ба роҳ монда шуда, иқтидори истеҳсолӣ ҳам афзун карда мешавад.

Таҷҳизонидани корхонаи дӯзандагӣ бошад, ҳоло идома дорад. Тибқи нақша дар ин корхона 30 ҳазор дона либосҳои кӯдакона дар як моҳ ё 360 ҳазор дар як сол дӯхта хоҳад шуд.

Дар ин маҷмаа, ки бо харҷи қариб 15 миллион сомонӣ бунёд ёфтааст, ҳоло ҳамагӣ 105 нафар бо кори доимӣ таъмин шудаанд.

Соҳибкори номбурда бо падару бародаронаш тасмим доранд, ки корҳои истеҳсолию хизматрасониро дар ин бино ва атрофи он идома дода, дар муддати кӯтоҳ беш аз 600 ҷойи корӣ муҳайё созанд. Оянда онҳо, аз ҷумла коргоҳи истеҳсоли чатрҳоро низ бунёд карданианд.

Хотиррасон бояд намуд, ки ду сол пеш аз ҷониби ҳамин соҳибкор дар паҳлӯи ин корхона маҷмааи варзишӣ низ бунёд ёфта буд. Дастпарварони гурӯҳҳои гуногуни ин маҷмааи варзишӣ аллакай натиҷаҳои намоён нишон медиҳанд.

Дар ноҳияи Ёвон бо иштироки Президенти кишвар Эмомалӣ Раҳмон боз як корхонаи коркарди пахта ба кор дароварда шуд, ки бо маблағгузории соҳибкорони ватанӣ бунёд ёфтааст.

Тавре иттилоъ доданд, ин корхона дорои иқтидори коркарди 15 ҳазор тонна пахта дар як сол мебошад.

Барои қабул кардану нигоҳ доштани пахта ва ҳам бо сифати баланд коркард намудани он дар ин ҷо ҳама шароити зарурӣ муҳайё аст. Корхона аз ҷумла дорои тарозуи электронии 60 тоннагӣ, 4 майдончаи ғарамсозии пахта, анбору айвонҳо ва барои муайян кардани сифати маҳсулот озмоишгоҳи муосир мебошад.

Дар ин корхона 75 нафар бо кор ва маоши миёнаи 1000 сомонӣ таъмин шудаанд.

Дар паҳлӯи ин корхона Сарвари давлат Эмомалӣ Раҳмон ба бунёди корхонаи равғанкашӣ асос гузошт.

Ин корхона дорои иқтидори коркарди 12 тонна пунбадона, дони офтобпараст ва ё лӯбиё дар як шабонарӯз буда, дар он 50 нафари дигар бо кор ва маоши 1000 сомонӣ таъмин мешаванд.